شو يعني نابلس؟ نابلس مدينة فيها لليوم الجارات بيقعدوا مع بعض، وإذا الجارة الي بآخر الحارة تعبانة كل يوم بمروا عليها الجارات وبسلوها، بياكلوا (مخلوطة = مكسرات إكسترا) هاي المخبية للغوالي، وعادي لو مريضة ممكن يعملوا أرجيلة تمباك وتأرجل معهم وتضحك.
نابلس الي بتشم فيها ريحة الخبز بالجبنة والزعتر وقرص الثوم والتمرية المقلية المحشية بالبالوظة، والحلاوة زلابيا من الصبح بدري، والي بيشتريها بجيبها بالكرتونه الكبيرة وبوزع للي حواليه.
نابلس يعني عكوب! يعني طبيخ الشوك الي ما حد في كل العالم عمله، باللحمة البلدي واللبن النعاج الي بكون بالقطرميز القزاز الي بنبدله من الدكان وما بناخد المليان إلا لنجيب الفاضي. أكلة ما بيفهمها منيح إلا الي تذوقها هناك.
نابلس يعني الكنافة الحقيقية. لازم تكون بالصدر الألمنيوم، والجبنة النابلسية الصح، ومغرقة بالقطر، والي بكونوا بيتغدوا وموصيين على كنافة بيحكو عالغدا (ما تقلو بالأكل...في آخرة).
نابلس الصابونة الي كل أهل نابلس لو وصلوا أمريكا ما بيتليفوا إلا فيها. نابلس صوت أم كلثوم بمنتزه العائلات العصرية والشمس عينها خجولة، وريحة ليلة القدر فايحة، والأمهات بأرجلوا والصغار بيلعبوا، والترمس وشعر البنات والفول (جديد عامله) عليه ملح وليمون ورشة بقدونس، والليمون المثلج الي عليه بوظة الفانيلا!
نابلس مدينة الصناعة والاقتصاد والخير والرواق والكيف، نابلس في أواخر الثلاثينيات وأوائل الأربعينيات كان فيها سينما! وستاتها كانوا أجمل النساء، يفصلوا تيابهن عند أشطر الخياطين ويلبسوا الفساتين والتانير وهن المدللات.
نابلس فيها الأديان الثلاثة عايشين مع بعض من مئات السنين. نابلس يعني فدوى طوقان وإبراهيم طوقان وعادل زعيتر و بسام الشكعة وكتير ناس وأعلام كبيرة كان إلهم الفضل في بناء المؤسسات التعليمية والثقافية والفكرية في هالمدينة العظيمة، حرام تصير هيك، حرام نابلس ما تكون مدينة آمنة.. حرام نابلس الواحد يصير يقول "أعوذ بالله" لما يفكر يمشي فيها.
رجعوا نابلس.. قلب فلسطين...
الكاتبة: لينا قادري
المحررة: سارة أبو الرب
*هذا النص لا يعبر بالضرورة عن وجهة نظر دوز
.jpg)
